فنان يتهم أشرف زكي بتضييق التعامل معه فنيًا.. والنقيب :" لا تعليق"

كتبت- سما جابر:

أعرب أحد الفنانين الشباب، ويُدعى أحمد إبراهيم، عن استيائه من نقيب المهن التمثيلية أشرف زكي.

وكتب "إبراهيم" عبر حسابه الشخصي على موقع فيسبوك، رسالة طويلة وجهها إلى الفنانين الكبار، ولاقت الرسالة انتشارًا واسعًا على مواقع التواصل الاجتماعي.

وقال الفنان الشاب: "ياريت أي حد حكيم من الوسط الفني يقول لى اتصرف إزاي مع الشخص إللي بيدير نقابة المهن التمثيلية، النقيب أشرف زكي.. للمرة العاشرة أو الـ11 حد يرشحني لشغل والمخرج يقول له مش هقدر أشغّل أحمد إبراهيم عشان أشرف زكي مايزعلش".

وأضاف: "طب معنى كده بقى إن الأخ النقيب موصي إن إللي هيشغلني هيزعل منه وطبعًا هو زعله وحش وناس كتير بلغوني إن اسمي بيترشح وبيتشال من الشغل عشان أشرف زكي حاططني في قايمة المغضوب عليهم.. والسنة دي بالفعل أنا مشتغلتش خالص واستحملت عشان أنا مش عاوز أوسع الموضوع".

وتابع أحمد إبراهيم: "بيوصلني تحريضه عليا وبسكت وبتعامل بالقانون في حقوقي، لحد دلوقتي لا حس ولا خبر عن شقق النقابة وبقول بكرة كل حاجه تتعدل، شتمني أنا وزمايلي ومارضتش اروحله واردله الشتيمة"، واستطرد: "أنا كده عداني العيب وقزح، الشخص ده بيمنع عني الشغل والكل عارف اني موهوب، طب المطلوب مني أعمل إيه.. ناس كتير اتدخلت وكلمته وهو رافض حتى مجرد إن حد يكلمه عليا، ماهو كده بقى الموضوع استقصاد وقطع عيش وأنا عندي بيت مفتوح".

واختتم: "اتمنى إللى يعرف شيوخ المهنة زي عادل إمام ولا صلاح السعدني ولا يسرا ولا المنتجين المحترمين يبلغهم إن أشرف زكي بيضيع مستقبل شاب موهوب، وأنا أقسم بعزة وجلالة الله لحد دلوقتي بتعامل بكل أدب، إنما لما توصل لأن شخص يتحكم في أكل عيشي ورزق ابني يبقى ياروح مابعدك روح، اللهم بلغت اللهم فاشهد.. ياريت إللي بيعزني يشير كلامي ده على أوسع نطاق عشان رسالتي الأخيرة تكون وصلت وابقى عملت إللي عليا بالذوق".

من جانبه تواصل "مصراوي" مع نقيب المهن التمثيلية، أشرف زكي، للرد على ما قاله "إبراهيم"، لكنه رفض قائلًا: "ماعنديش تعليق على الموضوع دة",